MEET HER

Að hægja á og lenda í líkamanum 

Fyrsta kvöldið gefum við okkur tíma til að mæta, lenda saman og setja tóninn fyrir ferðalagið fram undan. Ég býð þig velkomna, segi þér frá næstu sex vikum og þú færð fallega glósubók sem fylgir þér í gegnum allt ferðalagið.

Þungamiðja kvöldsins er Spiral Yin, iðkun þar sem ég blanda saman Yin Fascia Yoga og hreyfingum úr Spiral Yoga. Yin-ið hefur verið stór hluti af mínu eigin ferðalagi og hjálpaði mér mikið þegar ég var að vinna mig út úr kulnun. Það kenndi mér að hægja á, gefa líkamanum tíma til að losa um spennu og skapa meiri ró í kerfinu.

Í þessari iðkun flétta ég saman Yin Yoga, vinnu með bandvefinn og mýkra, kvenlegra flæði úr Spiral Yoga. Úr verður jarðtengjandi og líkamsmiðuð upplifun sem hjálpar þér að draga úr hraðanum, finna meiri ró og lenda betur í líkamanum.

Þess vegna byrjum við hér. Áður en við förum lengra inn í að finna, hreyfa, hlusta og tjá þurfum við fyrst að gefa líkamanum tíma til að mæta og finna meiri ró og öryggi.

Við lokum kvöldinu saman í hring, kynnum okkur og byrjum að skapa tengingu innan hópsins. Á milli tíma færðu svo lítið boð um að halda áfram að gefa líkamanum þessa athygli í daglegu lífi.

Að leyfa því sem er að finnast og hreyfast 

Eftir róna og jarðtenginguna í fyrstu vikunni færum við okkur inn í kraftmeiri upplifun. Ég leiði þig í gegnum Abundance & Self Trust, virkjandi 9D Breathwork ferðalag sem snýr að sjálfsefa, traustinu á eigin rödd og hugmyndum sem hafa haldið aftur af þér.

Öndunarvinna hefur verið stór hluti af mínu eigin ferðalagi síðustu ár og ég hef unnið með 9D Breathwork í tvö og hálft ár. Hún hefur sýnt mér hvað getur gerst þegar við hættum um stund að reyna að hugsa okkur í gegnum allt og leyfum önduninni að hreyfa við því sem við finnum.

Þetta er virk og kraftmikil upplifun þar sem öndun, tónlist, hljóð og leiðsögn vinna saman. Orkan fær að hreyfast og tilfinningar geta komið upp, en þú þarft ekki að framkalla neitt eða upplifa ferðalagið á ákveðinn hátt. Hver upplifun verður eins og hún þarf að vera þann daginn.

Abundance snýst hér ekki bara um peninga eða ytri árangur. Hún snýst um upplifunina af því að það sé rými fyrir þig, að þú þurfir ekki alltaf að berjast eða sanna þig og að þú megir treysta sjálfri þér og taka á móti því góða sem lífið býður upp á.

Þess vegna kallast þessi vika FEEL. Við ætlum ekki að greina allt sem kemur upp heldur leyfa okkur að finna það, anda okkur í gegnum það og gefa því rými til að hreyfast.

Á milli tíma færðu stutta hugleiðingu sem hjálpar þér að taka eftir hvernig sjálfsefi og sjálfstraust birtast í daglegu lífi og hvenær þú finnur að þú ert raunverulega að treysta eigin rödd.

Að hreyfa það sem þú finnur

Eftir að hafa hægt á í LAND og gefið tilfinningunum meira rými í FEEL fær líkaminn nú að hreyfa það sem er til staðar. Í MOVE notum við tónlist, frjálsa hreyfingu og dans til að kanna hvernig það er að fylgja líkamanum í stað þess að ákveða allt fyrirfram með huganum.

Þetta snýst ekki um að kunna að dansa, læra spor eða líta út á ákveðinn hátt. Þú þarft ekki að sýna neinum neitt. Hver kona fær að finna sína eigin hreyfingu og tjáningu. Stundum verður hún mjúk og hæg, stundum kraftmikil og frjáls — og stundum langar líkamann einfaldlega að hrista úr sér eða leika sér.

Hreyfing hefur hjálpað mér að komast úr höfðinu, hleypa orkunni á hreyfingu og finna aftur gleðina, frelsið og lífið í líkamanum. Hér fær kvenleg orka að birtast eins og hún er hjá þér; ekki bara í mýkt og ró, heldur líka í krafti, leik, gleði og tjáningu.

Þetta er rými til að sleppa aðeins tökunum, hreyfa þig á þinn hátt og finna hvernig það er að leyfa líkamanum að leiða.

Að hægja nógu mikið á til að heyra í sjálfri þér

Eftir kraftinn og tjáninguna í MOVE snúum við athyglinni aftur inn á við. Í þessari viku leiði ég þig í gegnum Sovereign Breath, 9D Breathwork ferðalag sem blandar saman djúpri ró og kraftmeiri köflum. Öndunin, tónlistin og leiðsögnin hjálpa okkur að draga úr hávaðanum og hlusta betur á það sem er að gerast innra með okkur.

Ferðalagið er skapað fyrir okkur sem höfum stundum leyft væntingum annarra, gömlum hlutverkum og hugmyndum um hverjar við ættum að vera að verða háværari en okkar eigin rödd. Í gegnum öndun, tónlist, myndræna leiðsögn og tjáningu færðu að mæta þeim stöðum þar sem þú hefur haldið aftur af þér, falið hluta af þér eða efast um það sem þú finnur og veist. Ekki til að verða ný útgáfa af þér, heldur til að komast nær sjálfri þér þegar þú hættir að reyna að vera það sem ætlast er til.

LISTEN snýst ekki um að fá skýrt svar við öllu. Hún snýst um að hægja nógu mikið á til að heyra betur í sjálfri þér og treysta því sem þú tekur eftir. Stundum kemur skýrleiki. Stundum finnur þú einfaldlega aðeins betur fyrir þér.

Að mæta sjálfri þér í gegnum líkamann

Eftir að hafa snúið athyglinni inn á við í LISTEN færðu nú að mæta sjálfri þér — í gegnum eigin skynjun og upplifun. Ég leiði þig í gegnum mjúkt, líkamsmiðað ferðalag þar sem við notum öndun, hreyfingu og valfrjálsa snertingu við eigin hendur, handleggi eða andlit til að kanna hvernig það er að vera meira til staðar í líkamanum.

Þetta er somatísk æfing og ekkert sem þú þarft að gera rétt. Hver kona fer í sitt eigið ferðalag innan leiðsagnarinnar. Þú gætir fundið fyrir mýkt og ró, krafti, forvitni eða löngun til að hreyfa þig. Þú þarft ekki að framkalla neitt, aðeins fylgja því sem þú tekur eftir.

Í þessari upplifun erum við líka að næra okkur sjálfar með nærveru og núvitund. Við gefum okkur þá athygli sem við beinum svo oft að öðrum og fáum að mæta okkur eins og við erum.

Fyrir mér snýst tengingin við okkur sem konur ekki um að verða mýkri, rólegri eða kvenlegri á einhvern ákveðinn hátt. Hún snýst um að finna meira fyrir okkur, leyfa líkamanum að tjá sig og vera nær þeirri sem við erum.

Þetta er MEET — að mæta sjálfri þér, ekki sem hugmynd um hver þú ættir að vera, heldur í gegnum beina upplifun af þér.

Að taka á móti og leyfa ferðalaginu að setjast

Á lokakvöldinu hægjum við á og gefum upplifun síðustu vikna rými til að setjast. Ég fæ til mín Lovísu Kristínu Einarsdóttur frá Love. Yoga, sem leiðir okkur í gegnum tónheilunarferðalag með gongum, skálum og öðrum hljóðfærum.

Þú færð að leggjast niður, koma þér vel fyrir og taka á móti hljóðunum, titringnum og nærverunni. Það er ekkert sem þarf að gera eða framkalla. Við bjóðum upp á te og gefum okkur tíma til að vera saman og loka ferðalaginu.

RECEIVE snýst um að leyfa sér að taka á móti — hljóði, hvíld, nærveru og þeirri næringu sem felst í því að þurfa ekkert að gera í smástund. Við gefum okkur líka tíma til að finna hvað við viljum taka með okkur áfram úr þessum sex vikum.